2 ‘kasaligan’ gitudlo ni Gullas sa CDRRMO

CEBU, Philippines - Bag-o na ang pangulo sa Talisay City Disaster Risk Reduction and Management Office (CDRRMO).

Kini maoy gipahibawo ni Mayor Eduardo Gullas ug iyang gipanganlan ang iyang napili nga haum ug kwalipikado sa posisyon nga si Alan Santillana.

Gihulipan ni Santillana mao si Christopher Estrabon nga nakasugat og daghang pagsaway.

Lakip nga gikuha ni Gullas mao ang anak ni Bise Mayor Alan Bucao isip ikaduhang labaw sa TCDRRMO kinsa wala pa nganli sa mayor.

Nasayran nga upat ka tawo ang nagtinguha sa posisyon sa TCDRRMO lakip na ang anak ni Bucao.

Asoy ni Gullas nga gipili niya si Santillana tungod sa iyang kasinatian ug kwalipikasyon samtang naa pa kini nagserbisyo sa Dakbayan sa Sugbo.

Si Santillana nagpuyo sa Dakbayan sa Talisay hinungdan sa paghatag og daku nga kompiyansa ni Gullas kaniya ug nipasalig nga andam siya mosuporta sa tanang ihangyo niini ilabi na kung ikaayo sa siyudad.

Nagtuo si Gullas nga madala og tarung ang TCDRRMO ilabi na nga duha ka tawo nga kasaligan ang iyang gipangbutang sa maong buhatan.

Samtang si Santillana niingon nga daku siya og pasalamat sa mayor nga siya ang gipili bisan pa man og dili sila kaila niini.

Sa pagkakaron nga nisugod na siya sa iyang trabaho gihan-ay una ni Santillana ang iyang buhatan gikan sa mga tawo ug mga ekipo ilabi na ang sakyanan nga pulos guba ug wala natagad.  (BANAT NEWS)