‘Teenage pregnancy’ nagkadaghan

CEBU, Philippines - Giawhag sa Hunta Probinsiyal sa Sugbo ang Provincial Health Office sa pagsusi sa nagkadaghang kaso sa teenage pregnancy ug giawhag usab sila nga mogama og support programs sa pagtubag sa problema.

Base sa pagtuon nasuta nga kasagaran sa mga teenager o batan-on nga inahan isalikway sa ilang mga ginikanan ug sa katilingban diin moresulta kini sa economic disability.

Ang mga bata nga gipanganak sa teenage mother kasagaran kanila makabaton og problema sa panglawas ug behavioral problem.

Ubos sa Provincial Adolescent Health and Youth Development Ordinance kinahanglang adunay maayong plano ug implementasyon ingon man epektibo nga pag-monitor ug evaluation sa mga programa alang sa mga batan-on sa probinsiya, kalungsuran, dakbayan ug kabarangayan.

Lakip niini ang life planning skills program, adolescent and youth health care services, prevention and management of reproductive tract infection sa HIV/AIDS ug uban pang transmittable infections ug pag-edukar sa kabataan kabahin sa sexuality ug sexual health, maternal health care, family planning information and services.

Dugang niini ang hunta probinsiyal nihangyo sa hingtungdang ahensiya sa probinsiya nga mosusi sa problema.

Gikataho nga ang Pilipinas lakip sa top 10 ka nasud nga nagkadaghan ang teenage mothers diin sa 10 ka inahan nga batan-on, kasagaran kanila nagpanuigon og ubos sa 19-anyos.

Base sa 2013 Young Adult Fertility and Sexuality Study, 78 porsiyento sa unang pre-marital sex sa mga Pinoy unprotected nga mabutang kanila sa risgo ngadto sa teenage pregnancy o STI, HIV ug AIDS.

Ang Rehiyon-7 nahimutang sa ikaupat kabahin sa pre-marital sex exposure. Pito sa 10 ka unang pre-marital sex giingong dili protektado batok sa STI ug pagsabak.  (BANAT NEWS)