Oplan Pokemon gilusad

CEBU, Philippines - Aron mas maklaro ang mensahe nga buot ipaabot sa kapolisan ngadto sa mga tawong padayong nagpakalubong sa ilegal nga drugas, migamit ang Cebu City Police Office og purlon sa ilang pag-harana aron masabtan ang ilang tumong.

Ang maong harana gitawag sa hepe sa Police Community Relations (PCR) sa CCPO, Supt. Chyrel Boniao nga Oplan Pokemon nga pahaom usab kaayo niining sikat kaayong mobile phone game nga “Pokemon Go.”

Apan sukwahi sa maong duwa nga mangita og mga pokemon ang players, ang mga polis mangita niining mga nalambigit sa ilegal nga drugas, users man o pushers sa kabarangayan.

Kabahin gihapon kini sa nasudnong kampanya sa kapolisan nga Oplan Tukhang ug Oplan Double Barrel aron awhagon kadtong mga nalambigit sa illegal drugs ug ilabi na kadtong gi-tukhang na sa pagtahan sa ilang kaugalingon aron sila matabangan.

Kagahapon sa buntag giadto sa mga polis ang Brgy. Suba ug Hipodromo aron subling manawagan ug ipahibalo sa mga tawo nga nagpadayon ang programa sa kapulisan batok sa ilegal nga drugas. Kauban sa maong kalihokan ang lokal nga kapulisan sa maong dapit San Nicolas Police Station nga gipangulohan ni Chief Insp. Keith Andaya ug mga sakop sa Special Weapons and Tactics (SWAT) team.

Ang grupo nagdala og purlon nga gibutangan og tarpaulin nga may nakasuwat kabahin sa programa batok sa ilegal nga drugas.

Si Andaya miingon nga  ang purlon usa ka mensahe ngadto sa mga  drug users ug drug pushers nga ang paggamit og ilegal nga drugas dili maayo ug kamatayon ray ilang padulngan.

Gawas sa purlon, adunay patrolcar nga nagsunod nga laing kapilian sa mga drug suspects pinaagi sa pagtahan sa ilang kaugalingon.

Sa San Nicolas Police Station kapin sa 200 na ka tawo ang mitahan apan si Andaya nagkanayon nga daghan pa gayod ang padayon sa ilang bisyo ug pagpamaligya og drugas.

Nanghinaot si Andaya nga pinaagi sa ilang pagharana mausab ang hunahuna niadtong ilang gitumbok nga mga nalambigit niini pinaagi sa pagtahan.

Ang mga polis miharana sa mga tawo sa maong mga barangay gamit ang mga kanta nga orihinal nila nga gihimo nga nagpaabot og mensahe nga hunongon na ang paggamit og ilegal nga drugas. Si Supt. Boniao miingon nga ilang gipaagi sa kanta ang panawagan aron mas dali nga masabtan ug mahinumduman sa mga tawo ang ilang gihimo.

Si Chief Supt. Noli Taliño, director sa Police Regional Office-7 miingon nga bisan unsang paagi ang buhaton sa kapolisan basta epektibo sa kampanya kontra illegal drugs iya kining suportahan.

Suporta simbahan

Si Taliño makigtagbo sa kadagkoan sa Archdiocese of Cebu aron personal nga pasalamatan ang kaparian sa suporta nila sa kapulisan sa kampanya kontra drugas.

Si Taliño miingon nga si Archbishop Jose Palma nangayo kanila og updates kabahin sa Oplan Double Barrel ug Oplan Tukhang. Matud pa ni Taliño nga nakurat ang simbahan sa kadaghan sa mga mitahan nga mga drug pushers ug users tungod sa kampanya sa kapulisan.

Sumala pa ni Taliño nga gipahibalo siya sa kaparian nga andam silang motabang sa pag-atiman sa mga mi-surrender ilabina sa rehabilitasyon.

Sa pagkakaron miabot na sa dul-an 72 mil ka tawo ang nitahan dinhi sa Central Visayas.  (BANAT NEWS)