Nagkaon gipusil patay

CEBU, Philippines - Gipusil patay ang usa ka lalaki samtang nagkaon daplin sa karsada sa sitio Rattan, Tanke, Dakbayan sa Talisay kagahapon sa buntag.

Ang biktima mao si Amasony Flores alyas Sony, hingkod, temporaryong nag-abang sa nahisgutang lugar ug lumad nga taga Tungkil, Lungsod sa Minglanilla.

Matud ni PO2 Stephen Sefuesca sa Talisay City Police Station nga mga alas 6:20 sa buntag nigawas sa giabangang balay si Sony aron mokaon.

Apan dihang nihungit na kini sa iyang pagkaon kalit kining giduol sa wala mailhing tawo ug giluyo sa pagpusil gamit ang wala matino nga kalibre sa armas.

Nahagba ang biktima sa karsada human nakaangkon og duha ka pinusilan sa luyong bahin sa iyang ulo.

Matud ni Sefuesca nga ang biktima walay kalambigitan sa ilegal nga drugas ug nag-abang kini sa lugar tungod kay nitrabaho kini kaniadto sa Talisay City District Hospital ug dihang naundang na sa trabaho, modawat na lang kini og bisan unsa nga trabaho nga isugo sa iyang mga silingan.

Nagtuo si Sefuesca nga personal nga bangi ang motibo sa krimen.  (BANAT NEWS)