Nakalapas sa trapiko sa Talisay ikiha
CEBU, Philippines - Han-ay na ang tanang dokumento aron sa pagsang-at og reklamo ngadto sa korte batok sa mga motorista nga naisyuhan og citation tungod sa kalapasan sa balaud sa kadalanan.
Si Hiram Binatero, pangulo sa City of Talisay-Traffic Operation Development Authority (CT-TODA), nibutyag nga siya mismo ang nag-andam sa mga affidavit nga ilang iduso ngadto sa korte karong semanaha.
Kadtong mga motorista nga naisyuhan og citation nga wala magtagad niini maoy pasakaan og kaso.
Matud ni Binatero nga mas maayo nga patagmon ang mga motorista nga nagsalig lang nga citation ra ang giisyu sa mga traffic enforcers.
Sa pagkakaron ang mga enforcers sa Talisay ang dili maka-isyu og Temporary Operator’s Permit (TOP) gumikan kay wala sila gi-authorized sa Land Transportation Office (LTO).
Gilauman ni Binatero nga magdasok na unya sa iyang buhatan ang mga motorista nga mohangyo nga dili na lang pasakaan og kaso.
Iyang gitug-an nga aduna sab unyay mga motorista nga magpalaban og mga politiko.
Gitudlo si Binatero ni Mayor Eduardo Gullas sa posisyon gumikan sa iyang kasinatian isip kanhi police general ug labaw sa tanan dili kini politiko nga mahadlok mopatuman sa balaud tungod kay mahadlok na nga dili butaran sa sunod eleksyon. (BANAT NEWS)
- Latest
