Mga adunay tuyo sa Lapu-Lapu gitambagan sa pagsayo

CEBU, Philippines - Ang paggikan og sayo gikan sa panimay paingon sa trabaho maoy awhag sa pangulo sa Traffic Enforcement Agency of Mandaue (TEAM) nga si Glenn Antigua.

Nunot kini sa masinati nga kalangan sa biyahe sa mga nagagikan sa dakbayan sa Sugbo o sa lungsod sa Consolacion nga nagtrabaho sa Mactan Export Processing Zone (MEPZ) tungod usab sa gipatuman nga proyekto sa Department of Public Works and Highways (DPWH) 7.

Ang kalangan sa pagbiyahe sa mga sakyanan nga molabay sa Marcelo Fernan Bridge ug Mandaue-Mactan Bridge nasinati  sugod pa niadtong Agosto 15 tungod sa nagpadayong road concreting project sa dalan Plaridel sa Barangay Alang-Alang.

Nasayran nga gipatuman sa DPWH 7 ang road rehabilitation project sa Mandaue pinaagi sa pagbahig ngadto sa upat ka section basi usab sa contract budget nga P40.94 milyones.

Gilangkuban kini sa 350 meter road rehabilitation sa D.M. Cortes St. nga kanhi dalan Plaridel nga nagsugod sa may Seaoil Gasoline Station paingon sa eskina sa U.N. Avenue.

Ang P.B. Obial Construction nga maoy kontraktor sa proyekto gihatagan og lugway sa pagtapos sa maong proyekto sulod karong bulana.  Istriktong gibantayan  sa mga traffic enforcer ang mga dalan nga nagpaingon sa dakbayan sa Lapu-Lapu nga molabay sa duha  ka mga taytayan sa pagsiguro nga dili mag-ilog ang mga drayer sa dalan.  (BANAT NEWS)