Blue guards banhawon sa Talisay

CEBU, Philippines - Naglaraw si Talisay City Mayor Eduardo Gullas sa pagbutang unya og mga blue guard sa tanang buhatan sa gobiyerno sa dakbayan.

Apan gusto sa mayor nga ipaubos sila sa insaktong proseso sa pag-hire aron dili makasugat og daghang kontrobersya ug kaso. Sa nasayran, napasakaan og kaso si kanhi mayor Johnny V. de los Reyes, iyang anak nga si John Yre de los Reyes kanhi city administrator ug uban pang opisyal sa dakbayan human sila nikuha sa serbisyo sa Black Pearl Security Agency nga wala gipaagi sa saktong proseso.

Sukad niadto gihunong na ang kontrata sa maong agency tali sa siyudad. Hangtud karon walay blue guards nga makita sa city hall ug uban pang mga establisemento nga iya sa gobiyerno sa dakbayan sa Talisay. Sa pagkakaron, si Gullas nibutyag nga iya unang pakigkitaan ang tanang department heads aron pangutan-on sa ilang panahom labot sa maong plano.

Nasayran nga ang ihawan sa Talisay maoy unang butangan og blue guards aron mubantay sa maong estalisemento nga maoy abutanan sa mga negosyante og karne.   (BANAT NEWS)