Firetruck gihimong ambulansiya
CEBU, Philippines - Giangkon sa pangu sa kabomberohan sa dakbayan sa Talisay nga tulo na lang ka firetruck ang ilang magamit panahon nga adunay alarma sa sunog nga mahitabo sa Talisay o sa silinganang siyudad o lungsod.
Si FCInsp. Randy Mendaros miingon nga lima gyud unta ang ilang magamit nga firetruck apan ang duha niini pulos mga guba. Sa tulo ka firetruck nga moresponde sa sunog mao sab ni ang ilang gamiton sa panahon nga adunay madisgrasya sa kadalanan o adunay mga tawo nga samaran sa kadalanan kay ang ambulansya sa siyudad pulos sab guba.
Tungod niini si Mayor Eduardo Gullas niingon nga iya nang gihangyo si Kongresista Gerald Anthony “Samsam” Gullas nga tagaan sila og firetruck aron sab makadaginot ang siyudad.
Si Gullas nibutyag nga ang kagamhanan sa Talisay mopalit gyud og ambulansya nga magamit sa tanang nanginahanglan niini.
Dugang niya nga unta hangyuon ni Kongresista Gullas ang Bureau of Fire and Protection (BFP) nga mogahin og pundo alang sa dakbayan bisan og usa lang ka firetruck.
Gipasabot ni Gullas nga mahimo silang makapalit og firetruck kay aduna man silay budget apan kun adunay ihatag mas labing maayo kini aron ang kwarta nga ipalit og firetruck mahimo pang mapahimuslan sa laing katuyuan. (BANAT NEWS)
- Latest
