Rama desididong motapon sa PDP-Laban

CEBU, Philippines - Bisan pa man sa alegasyon nga naglambigit niya sa ilegal nga drugas, si kanhi Cebu City mayor Michael Rama nagpabilin sa iyang desisyon nga mahimong sakop sa Partido Demokratiko Pilipino-Lakas ng Bayan (PDP-Laban).

Apan ang maong plano molanat pa og igong panahon tungod kay adunay mas importanteng buluhaton ang kanhi mayor kinsa gihinganlan ni President Rodrigo Duterte sa usa sa mga gikatahong drug protector.

“That (intention) will come later but what is primordial is our family name… I will be focusing first to get that family name of mine, if possible, out of the list… It will just be a matter of time and consequence,” matud ni Rama sa dihang nagpatawag kini og press conference kagahapon sa hapon sulod sa Rama compound sa Brgy. Basak, Cebu City.

Si Rama nagkanayon nga dugay nang naumol ang maong plano nga ang tibuok Team Rama motapon ngadto sa PDP-Laban nga gipangulohan ni Duterte.

“That has been the intention long time ago… as far as at the outset, that has long been my position to bring the whole Team Rama to have an alignment with PDP-Laban right after the election,” matud ni Rama, kinsa napildi ni Tomas Osmeña sa miaging eleksyon niadtong Mayo 9.

Sa pagkawala sa pangu sa Team Rama, pipila sa mga kaalyado niini mitapon sa PDP-Laban ug mi-take oath niadtong Sabado sa ilang alyansa sa maong ruling party bisan wala ang presensya ni Rama.

“Perhaps, you might be asking why I wasn’t there. Obviously, I have been pondering that it would be good for the party in view of the fact that I, as being part in the pronouncement being mentioned (on the list) and that in a way would not muddle the oath taking ceremony with my presence,” matud ni Rama.

Si Rama mipadayag nga nahimutang pa siya karon sa lisod nga sitwasyon   human nahiapil iyang pangalan sa mga gikatahong drug protector.

Dugang niya, wala pa usab siya nahatagan og higayon nga makaatubang ug makahinabi ang presidente. Apan si Rama mihatag sa iyang suporta sa mga kaalyado niini nga miuna og uban sa PDP-Laban.

Matud pa niya, ang iyang partido gusto og kausaban ug nisuporta sila sa pederalismo nga giduso sa pangulo ug dako silang uyon sa kampanya kontra krimen sukad pa kaniadto.

Masaligon usab si Rama nga ang pagsuporta usab sa mga kapitan sa barangay makatabang aron mahimong epektibo ang mga programa sa bag-ong administrasyon.

Si Rama nagkanayon nga iya usab girespetar ang desisyon sa iyang mga kaalyado nga wala motapon sa PDP-Laban sama ni Konsehal David Tumulak nga gustong mahimong independente.

“And if you are also asking with respect to Dave Tumulak. Of course, I do not have any anger. I wish him the best. Good luck,” matud niya.  (BANAT NEWS)