Magtiayon patay sa bangga
CEBU, Philippines - Patay ang usa ka Filipino-American ug ang iyang asawa ug walo sa ilang mga kauban ang naangol human mibalitok ang ilang gisakyan nga pick-up diha sa national highway sa Brgy. Ocaña Dakbayan sa Carcar, pasado alas 5 sa kagahapon sa buntag.
Ang magtiayon giila nga sila si Keith Rosel, 36, usa ka Pinoy apan nahimo nang American citizen ug Nygile Rosel, nga nagpuyo sa Brgy. Poblacion sa Lungsod sa Sibonga.
Si Police Officer 1 Ariel Yap, desk officer sa Carcar City Police nga nahinabi sa Banat News nagkanayon nga ang bana nga si Keith mao ang nagmaneho sa sakyanan blue Ford Ranger gikan sa Cebu City padulong sa Sibonga.
Apan pag-abot sa maong dapit kalit lang miharos ang sakyanan sa railing sa kilid sa kalsada ug midasmag sa kahoy hangtud nga kini mibalitok.
Ang kapulisan dili pa makahatag og impormasyon kun unsay hinungdan sa pagkabangga sa pickup apan sila nagduda nga nakatulog ang drayber sa pick-up.
Ang magtiayon ang sulay pa unta nga gidala sa Cebu Provincial Hospital, sa Dakbayan sa Carcar apan kini gideklara nga dead on arrival sa nag-atiman nga doktor.
Si Yap miingon nga kung basihan ang hulagway sa hitabo posibleng kusog ang dagan sa sakyanan.
Alang ni Yap talagsaon ra sab kaayo ang maong hitabo kay imbes ang ulo sa sakyanan ang mabangga sa punoan sa kahoy ang windshield sa atubangan man gayod sa pick-up maoy mibunal sa kahoy hinungdan nga nagrabehan ug maayo ang magtiayon nga naa sa atubangan.
“Kung ang ulo ra unta to sa pick-up ang midasmag sa kahoy, lagmit buhi ra to’ng duha, pero lahi man ang nahitabo ang windshield man ang nabunal sa kahoy,” matud pa ni Yap.
Walo sa mga naangol ang gidala sab sa maong tambalanan nga nakaangkon og mga bun-og sa kalawasan.
Sila giila nga si Ariel Rosel, 23, Primitivo Rosel ,54, Edcel Rosel ,19, Stephen Rosel, 23, Nikkame Rosel, 19, Melody Cantona ,24, Erwin Llanos, 39, ug Florian Anuda ,20, nga pulos kadugo sa magtiayon.
Hinuon sa pagkutlo niini’ng balita gikatahong ang walo nakagawas na sa tambalanan. (BANAT NEWS)
- Latest
