Ilisan ang sakop sa Talisay SportsComm
CEBU, Philippines - Gitinguha ni City of Talisay Councilor Rodolfo Cabigas nga ilisan ang mga tawo nga anaa sa Sports Commission (SportsComm) sa maong siyudad.
Kini human iyang nakita nga dili kaayo ma-representahan ang ubang barangay sa natad sa paugnat sa kusog. Gibutyag sa konsehal nga sa pagkakaron ang mga miyembro sa SportsComm mao ang mga department heads, ubang mga konsehal ug aduna la’y duha gikan sa private sector.
Si Cabigas naglaraw nga kinahanglan nga ang mahimo na unyang sakup niini mao kadtong gikan sa pastoral council aron masabwag gyud ang mga kalihukan sa paugnat sa kusog aron sab nga madani ang mga kabatan-onan sa sports ug malikay sa mga bating bisyo. Dugang niini nga daghan unya sila’g mga sports events nga ipaila-ila sa mga Talisaynon sama sa futsal ug dragon boat. Ila sab ibalik ang softball kay ang Talisay naila man sa maong duwa.
Sa pagkakaron ila unang gipokus ang tinuig nga Mayor’s Cup nga tipik ug kabahin sa kalihukan sa kapistahan ni Santa Teresa de Avila karong Oktubre 15. Asoy pa ni Cabigas nga ang duwa sa basketbol dili gyud mawala matag tuig ug mao sab kini ang atngan sa kadaghanan kun diin mag-abot ang ilang mga bag-o ug karaang basketbolista sa matag barangay. (BANAT NEWS)
- Latest
