Walay makapuli ni Tining

CEBU, Philippines - Uyon ra si Bise Gobernador Agnes Magpale nga isibog ang piniliay sa Barangay ug Sangguniang Kabataan (SK) apan misugyot kini nga sunod tuig kini himoon ug dili sa sunod pa gyud.

Nagtuo si Magpale nga dili madayon ang piniliay sa Barangay ug SK karong Oktubre kay bisan si Presidente Rodrigo Duterte pabor sa pagsibog niini.

Pipila na ka  mga senador ang nagtinguha nga ma-postpone ang eleksyon sama ni Senador Joel Villanueva kinsa miduso og proposal nga nag-uswag sa eleksyon gikan sa Oktubre 31 karong tuiga ngadto sa uwahing Lunes sa bulan sa Oktubre sa tuig 2018.

Matud ni Magpale nga kun sa sunod tuig ang piniliay makatabang kini aron makalimtan sa mga politiko ang kainit sa 2016 National Elections.

Apan nabalaka kini nga kun walay mahitabong eleksyon sa barangay election, walay representante ang Liga ng mga Barangay sa hunta probinsiyal human gi-dismiss sa serbisyo ang Association of Barangay Council President (ABC) nga si Celestino “Tining” Martinez III tungod sa kalambigitan niini sa fertilizer scam.

Nasayran nga walay makapuli ni Tining kay ang bise presidente niini nga si Emirito Calderon maoy napili nga Mayor sa lungsod sa Samboan ug ang rule of succession sa federasyon sa barangay kutob lang sa bise presidente.

Gitataw hinoon ni Magpale nga gamay ra kini nga problema ug makalihok ra ang provincial board, sama niya nga adunay gikuha nga consultant sa barangay affairs.  (BANAT NEWS)