Dangpanan sa mga batang libud-suroy

CEBU, Philippines - Mga street children ug children in conflict with the law (CICL) duna nay dugang kapuy-an sa My Home Center (MHC) diha sa dakbayan sa Mandaue.

Sukad sa pagbukas sa MHC niadtong buwan sa Oktubre sa milabay nga tuig kasamtangan aduna kini 52 ka bata nga giatiman.

Ang maong mga bata nagagikan sa dakbayan sa Mandaue ug mga silingang kalungsuran ug siyudad.

Ang hepe sa MHC Mandaue nga si Mariel Yu nibutyag nga kasagaran sa maong mga bata gi-refer kanila ug sa social workers ug uban kanila na-rescue sa mga street educators gikan sa kadalanan.

Nasayran nga ang labing bata nga nagpuyo sa maong pasilidad nga gitawag og “children at risk aged” nagpanuigon og ubos sa 15 anyos kinsa nalambigit og petty  crimes.

Ang MHC hiniusang proyekto sa kagamhanan sa dakbayan sa Mandaue diin ang pundo pinaagi sa Bottom-Up Budgeting (BUB) Program sa Department of Interior and Local Government (DILG).

Gibutyag ni Yu nga ang kagamhanan sa dakbayan sa Mandaue migahin og P22 milyones alang sa phase 1 sa proyekto ug site development samtang ang BUB maoy migahin sa P12.6 milyones sa pagpatukod sa phase 2 building.

Samtang ang nasyonal nga kagamhanan mihatag sab og laing P1.5 milyones alang sa mga ekipo sa maong center.

Ang mga bata nga dili residente sa dakbayan sa Mandaue nga na-rescue sa mga polis i-refer sa MHC.

Human maumol ang mga bata sa center, iuli sab sila ngadto sa ilang komunidad o pamilya.

Sa sinugdanan adunay mga bata nga niikyas apan sa mga milabay nga panahon ang mga bata naanad na sa pagpuyo sa center.

Sa sulod sa maong pasilidad aduna kini nagkalain-laing kalihukan sama sa information technology sessions, gardening, arts, self-awareness activities, projects ug academic studies.

Kadtong mga bata nga andam na alang sa formal schooling pa-eskwelahon sa kagamhanan sa Mandaue sa duol nga pampublikong tunghaan sa elementarya ug high school.

Ang maong pagpaeskwela kanila ubos usab sa tabang sa non-government organizations ug Alay Lakad.

Dugang niini, ang MHC adunay P10 milyones nga operational budget alang karong tuiga.  (BANAT NEWS)