Giselosan sa amigo, gidunggab

CEBU, Philippines - Gidunggab ang usa ka kargador sa cargo ship sa iya ra usab nga higalang kargador niadtong Biyernes sa gabii duol sa Coast Guard Headquarters sa Barangay Tinago dakbayan sa Sugbo tungod sa selos. Giila ang biktima nga si Jimmy Ponce, 27 anyos.

Matud ni SPO2 Rommel Bancog, nga gidunggab ni Edwin Sanchez, 41 anyos ang biktima human makit-i sa suspek nga nagtabi ang biktima ug ang iyang asawa.

Si Sanchez kinsa nisibat human sa maong insidente, nagselos sa iyang higala ug sa iyang asawa ug nagtuo kini nga aduna silay gitaguan nga relasyon.

Basi sa imbestigasyon sa kapolisan, ang biktima igo rang mipahimangno sa asawa sa suspek nga dili pasagdan ang anak niini sa karsada. Dihang padung nang mulakaw ang biktima, kalit lang kining gidunggab sa suspek sa iyang likod.  (BANAT NEWS)