Plaka usbon paglikay sa kolorum nga traysikol
CEBU, Philippines - Planong usbon sa kagamhanan sa dakbayan sa Lapu-Lapu ang mga plaka sa mga narehistrong traysikol, matud ni Mayor Paz Radaza.
Gibutyag sa mayor nga mga karaan na ang mga plaka sa mga traysikol nga aduna nay franchise ug lisensiya daan.
"We will be changing the plate numbers of the franchised tricycle. Sobra na man ka daan. Ang sa jeep, sa LTFRB na," tataw ni Radaza. Usa sab kini ka pamaagi aron mahibaw-an kun pila kabuok ang mga kolorum nga mga tricycle nga nag-operate sa siyudad.
Matud ni Radaza, gibana-banang anaa sa 4 mil ka traysikol ang anaa sa dakbayan samtang susihon pa niya kun pila kabuok ang kolorum nga traysikol ang nasikop sa polis ug sa mga traffic personnel kay padayon pa ang pagpanakop niini.
Gitataw sa mayor nga ang City Administrator nakighinabi sa kabarangayan atol sa paghimo og report kun pila ka habal-habal, traysikad ug traysikol anaa sa usa ka barangay.
"They have to make a report kung pila ang habal-habal, pila ang traysikad, pila ang traysikol in their barangays. I-identify na nila kung dunay license or dunay franchise," matud ni Radaza.
Sa pagkakaron, nakigkoordinar ang City Traffic Management Systems ngadto sa Lapu-Lapu City Police Office alang sa pagpanakop og mga kolorum nga mga sakyanan.
Kahinumduman nga nagsugod ang pagpanakop sa siyudad sa niaging buwan sa Hulyo. (BANAT NEWS)
- Latest
