Hitman ni Barok napatay

CEBU, Philippines - Giingong hitman sa gipasanginlang drug lord nga si Alvaro Alvaro alyas Barok napatay atol sa buy-bust operation diha sa Sitio Tuburan, Brgy. Guisok sa Dakbayan sa Danao niadtong Biyernes sa buntag. Ang napatay naila nga si Christian Baton alias Ekit, residente sa Pulangyuta, Looc, Danao City. Si Senior Inspector Alejandro Batobalonos, hepe sa Danao City Police Station nagkanayon nga ilang gipaubos og surveillance si Baton bisan ni-surrender na kini niadtong Hulyo tungod sa Oplan Tukhang.

Kini tungod kay bisan nitahan na kini, wala gihapon kini mohunong sa pagpamaligya og ilegal nga drugas.

Sa alas 9:13 sa buntag gihimo sa City-Anti Illegal Drugs Unit (CAIDU) sa Danao City Police Station ang buy-bust operation apan nisangpot kini sa pinusilay ug niresulta sa kamatayon ni Baton. Matud pa ni Batobalonos, human sa transaksyon nakabantay ang suspek nga polis iyang kasabot ug mibunot kini dayon sa iyang armas dayon diretso og pabuto ngadto sa mga polis.

Tungod niini, nibawos ang mga polis ug naigo ang suspek. Gidala pa unta kini sa tambalanan apan nakabsan gyud sa iyang kinabuhi.

Ang operatiba nakakuha og caliber .9mm pistol, usa ka medium size heat-sealed nga transparent plastic sachet nga may sud nga gituohang shabu, P300 cash ug ang P200 buy-bust money gikan sa possession sa suspetsado. Si Baton maoy giingong hitman ni Alvaro kinsa kasamtangan na karong gipriso diha sa Cebu Provincial Detention and Rehabilitation Center.  (BANAT NEWS)