Gidasmagan sa prime mover patay
CEBU, Philippines - Lalaki nga deretso nikuros sa pagpadagan sa iyang motor ang nadam-agan patay sa 6-wheeler prime mover sa Barangay Central Poblacion, Dakbayan sa Naga pasado ala una sa kaadlawon kagahapon. Ang nakalas naila nga si Anatalio Obaner Jr., 26-anyos, taga Barangay Mainit sa maong dakbayan ug usa ka manupihay.
Samtang ang driver sa 6-wheeler prime mover nga dunay plate number GXM-114 mao si Albert Jayno, 22-anyos, taga Barangay Kan-abok, Bais City.
Matud ni Police Officer 3 Michael Villarmia, desk officer sa Naga City Police Station, nga base sa initial nga imbestigasyon gikan sa habagatan sa Probinsiya sa Sugbo ang prime mover padulong sa Dakbayan sa Sugbo dihang kalit nikuros paglabang ang motor nga walay tan-aw-tan-aw sa palibot ang biktima.
Sumala pa ni Villarmia nga maayong pagka-igo ni Obaner sa prime mover hinungdan sa pagkalamba niini ug dali nga gidala sa Minglanilla District Hospital apan alas 5 sa kadlawon gideklarar kining patay na.
Kasamtangang gikustodiya ang driver sa kapolisan ug gipaabot nila ang pagpasang-at og tukmang kaso sa pamilya sa namatay.
Kasong reckless imprudence resulting to homicide ang hayan ipasaka batok sa driver sa prime mover. (BANAT NEWS)
- Latest