Amahan nidepensa, anak napatay
CEBU, Philippines - Patay ang usa ka anak human gipusil sa iyang amahan sa Napo, Guindaruhan, Lungsod sa Minglanilla pasado alas 2 sa nakalabay nga kadlawon.
Ang biktima giila nga si Rogelio Manguray Jr., 31, samtang ang amahan mao si Rogelio Manguray Sr., 67, biyudo ug pareho nga nagpuyo sa maong dapit.
Ang desk officer sa Minglanilla Police Station nga si Senior Police Officer 2 Oliver Dacua nga nahinabi sa Banat News nagkanayon nga nahitabo ang insidente human nisulong ang anak nga hubog sa balay sa iyang amahan nga nagdala og taas nga pinote.
Si Dacua niingon nga igo lang nidepensa ang amahan dihang paingon na unta kini nga tigbason sa iyang anak.
Duha ka bala sa .45 caliber pistol ang nikutlo sa kinabuhi sa anak.
Nagduda si Dacua nga lagmit duna nay panagbikil sa amahan ug anak diin kini subli lang nga nabuhi dihang nahubog ang biktima.
Sumala pa ni Dacua nga nakahatag na sa iyang affidavit ang asawa sa biktima ug andam sab kining mopasaka og kaso sa iyang ugangan.
Kasong parricide ang atubangon sa amahan nga kasamtangang gitanggong sa selda sa Minglanilla Police Station. (BANAT NEWS)
- Latest
