Davide nihangop sa posisyon ni Sitoy
CEBU, Philippines - Gihangop ni Gobernador Hilario Davide III ang pagkaapil ni Cordova Vice Mayor Adelino Sitoy sa Gabinete ni Presidente Rodrigo Duterte.
Si Sitoy niluwat sa katungdanan isip bise mayor sa Lungsod sa Cordova human siya gitudlo ni Duterte nga Presidential Adviser on Legislative Affairs ug pangulo sa Presidential Legislative Liaison Office.
Si Sitoy gikatakdang magsugod sa iyang bag-ong posisyon karong Septiyembre 1.
Matud ni Davide nga nalipay siya ug mapasigarbuhon nga usa ka Cebuano ang napili sa Presidente nga mahimong sakop sa iyang Gabinete.
Si Davide nagkanayon nga si Sitoy haum sa posisyon tungod kay sa wala pa kini napiling mayor sa lungsod, miyembro kini sa 1984 Batasang Pambansa Parliament nga nagrepresentar sa Sugbo.
Matud ni Davide nga matawag nga pabor sa habig sa mga Sugboanon ug sa probinsiya ang pagka-miyembro ni Sitoy sa Gabinete sa Presidente tungod kay makabaton sila og koneksiyon ngadto sa Malacañang. (BANAT NEWS)
- Latest