Tommy supak way Barangay, Sangguniang Kabataan elections

CEBU, Philippines - Supak si Cebu City Mayor Tomas Osmeña sa pag-uktaba sa eleksiyon sa Barangay ug Sangguniang Kabataan nga gikatakda karong Oktubre.

Gihulagway ni Osmeña ang umaabot nga eleksiyon nga kagawasan kini sa mga tawo nga makapili og opisyal nga sa ilang tan-aw makahatag og kaayuhan.

Nagtuo si Osmeña nga basin daghang kongresista ang walay pundo ug mahadlok mopagawas og dakung kantidad sa kwarta maong gitinguha nila ang pag-uswag sa piniliay.

Apan alang sa mayor nga mas maayo nga walay mga dagkung opisyal nga motabang og gasto pinaagi sa paghatag og funding aron ang eleksiyon karong Oktubre 31 patas alang sa ubang kandidato nga modagan nga walay pundo ug suporta gikan sa mga dagkung opisyal.

Wala usab mabalaka si Osmeña kun mahinayon man ang piniliay sa Oktubre 31 sanglit sa 80 ka barangay sa siyudad, 12 ra ang naa sa iyang habig ug daku ang iyang pagtuo nga dili mapilde ang iyang mga kandidato nga magpapili karong eleksiyon.

Samtang si Mandaue City Mayor Gabriel Luis “Luigi” Quisumbing pabor nga iuswag ang piniliay tungod kay gasto kaayo kini ilabi na nga bag-o pa lang gipahigayon ang local ug national elections.

Apan ang gusto sa mayor nga inay sa 2018 ipahigayon ang Barangay ug SK elections, usa ka tuig lang ang pagsibog niini tungod kay motaas ang termino sa mga barangay officials kung adto pa sa 2018 ang eleksiyon.

Nasayran nga ang postponement sa Barangay ug SK elections napasar na sa first reading sa Kongreso ug Senado.  (BANAT NEWS)