Wa gihapoy gana si Osmeña sa Mega Cebu

CEBU, Philippines - Wala gihapon mausab ang huna-huna ni Cebu City Mayor Tomas Osmeña kabahin sa Mega Cebu bisan pa man sa kapin usa ka oras nga pakigtagbo ug diskusyon uban kaniya sa mga kadagkoan niini.

Nagpabilin gihapon sa iyang desisyon ang mayor nga dili moapil ang siyudad sa Sugbo sa Mega Cebu.

Ang Mega Cebu usa ka programa sa Metro Cebu Development Coordinating Board (MCDCB) nga naglaraw nga himuon “livable” ug “sustainable” nga lugar sa tuig 2050 ang Sugbo.

Ang MCDCB gilangkuban sa 13 ka Local Government Units (LGUs) apan si Osmeña daan nang mipahibawo nga dili na moapil ang Cebu City niini.

Gibutyag sa mayor  nga  nagbayloay lamang sila og mga impormasyon, ideya ug komento kalabot sa Mega Cebu apan sa gihapon dili siya interesadong paapilon ang siyudad niini.

Pipila sa mga rason nga mi-back out ang Cebu City sa Mega Cebu tungod kay niadtong mga nangaging mga katuigan nga siya ang mayor daghan sa iyang mga proyekto ang matud pa gibabagan ug wala suportahi.  (BANAT NEWS)