Igsuon sa gaway ni Sabalones nadakpan
CEBU, Philippines - Kapin sa P150 mil nga kantidad sa gituohang shabu ang nasakmit sa mga sakop sa Philippine Drug Enforcement Agency (PDEA)-7 atol sa buy-bust operation nga ilang gihimo diha sa Highway Seno sa Dakbayan sa Mandaue niadtong nakalabay nga hapon.
Nadakpan sa mga ahente sa PDEA-7 sila si Mischelle Capalaran Gerona, 27, ug Jomar Gualiza Ponsica, 32, pulos nagpuyo sa Pulangbato, Cebu City.
Ang director sa PDEA-7 Yogi Ruiz nga nahinabi sa Banat News miingon nga ang orihinal nila nga nakasabot og palitan og drugas mao si Jeffrey Capalaran, usa sa giingong mga sinaligan ni Franz Sabalones, usa sa mga drug lord sa Sugbo nga mitahan na sa Campo Crame.
Si Ruiz miingon nga si Capalaran mao ang number 5 sa ilang listahan sa mga notadong drug personalities dinhi sa rehiyon.
Apan wala nipakita si Capalaran apan iyang gipadala ang iyang igsuong babaye nga si Gerona kauban si Ponsica.
Human nakatunol sa drugas ang babaye gamit ang budol money nga P50 mil dali nga gisikop sa mga operatiba ang duha.
Nakuha sa mga polis gikan sa mga dinakpan ang buy-bust money ug ang shabu nga mitimbang og 25 gramos.
Nakuha sab sa taga PDEA-7 ang selpon ni Gerona ug kini karon ang ilang gisubay aron masayran kung asa gikan ang supply niini sa drugas. (BANAT NEWS)
- Latest