Ipa-trace ang nanghulga

CEBU, Philippines - Posibleng mangayo’g tabang ang Provincial Women Commission (PWC) sa Criminal Investigation and Detection Group (CIDG) sa pag-ila sa nipadala og death threat pinaagi sa text message ngadto sa usa sa mga miyembro sa PWC.

Si Bise Gobernador Agnes Magpale, co-chairman sa PWC nibutyag kagahapon bahin niini. Ang maong sakop sa PWC mitabang kanila sa imbestigasyon sa cyber pornography sulod sa Cebu Provincial Detention and Rehabilitation Center (CPDRC).

Wala gibutyag ni Magpale ang pangalan sa ilang sakop lakip na ang unod sa nadawat nga text message. Giingong si Thomas Michael Ruhland usa ka German national  ug si  Eileen Ontong, nasakpan  sulod sa CPDRC nga nagpadayon sa ilang operasyon sa cyber pornography. Matud pa si Ruhland bisan og naa sulod sa CPDRC nitawag sa iyang igsuon sa Germany ug nagpahibawo nga namiligro ang iyang kinabuhi.

Matud ni Magpale posibleng mangayo sila og tabang sa CIDG aron mailhan kun kinsa ang nanghulga ug gipahimangnoan niya ang maong miyembro nga magbinantayon.

Bisan og wa siya makadawat og threat, nag-amping na usab si Magpale. Iyang giklaro nga ang maong threat dili makaapekto sa ilang pag-imbestigar sa mga ilegal nga kalihukan.

Unang nakadawat og death threat ang hepe sa Cebu Provincial Anti-Drug Abuse Office (CPADAO) nga si Ivy Durano-Meca tungod sa kampaniya batok illegal drugs hinungdan nga si Gob. Hilario Davide III mi-request sa Cebu Provincial Police Office nga butangan kini’g dugang security.  (BANAT NEWS)