Traffic enforcer gipatay sa nag full-faced helmet
CEBU, Philippines - Traffic enforcer sa lungsod sa Consolacion nga mosulod na unta sa iyang trabaho kagahapon sa buntag, gipusil patay sa wala mailhing tawo nga nag-full faced helmet dili layo sa San Narciso Parish sa Brgy. Pulpogan sa nahisgutang lugar. Ang nakalas mao si Antonio Gutierrez, 42 anyos taga Brgy. Bulog sa maong lungsod.
Matud ni PO1 Cresenciano Saladaga, desk officer sa Consolacion Police Station nga base sa ilang initial investigation, nagsakay sa iyang motorsiklo si Gutierrez gikan sa ilang balay. Pag-abot sa lugar, mulabang na unta kini padulong sa munisipyo aron mosulod sa ilang buhatan dihang kalit nga gibirahan sa wala mailhing tawo nga nagmotorsiklo. Gikaligo og bala ang lawas sa biktima. Gani nakuha sa crime scene ang walo ka kabhang sa kalibre .45 ug 4 ka deformed slugs.
Dugang ni Saladaga nga padayon pa silang nihimo og lawom nga imbestigasyon aron ma-establisar ang motibo niini. Daku ang ilang pagtuo nga adunay dakung kalagot ang mamumuno ngadto sa biktima. Gani wala nila gisalikway nga adunay kalambigitan sa trabaho ang motibo sa pagpamusil mao naglakip kini sa ilang imbestigasyon.
Gibutyag ni Saladaga nga ikaduha na si Gutierrez nga traffic enforcer sa lungsod sa Consolacion nga gipatay karong tuiga. (BANAT NEWS)
- Latest