JVR, John Yre wa pa kauli sa mga butang

CEBU, Philippines - Nagpakisayud sa buhatan sa Talisay City General Services Office sila si kanhi mayor Johnny de los Reyes ug iyang anak nga si kanhi city administrator John Yre de los Reyes kung unsa nga mga butang ang wala pa nila mauli.

Kini human ang duha ka kanhi opisyal ang pakyas pa sa pagkuha sa ilang separation pay gikan sa City Hall.

Si Joan Vebar, pangulo sa GSO, nagkanayon nga ang duha aduna pay mga butang nga wala mauli nga gipanag-iya sa siyudad.

Matud ni Vebar nga wala pa makauli ang kanhi mayor sa ubang ekipo sa opisina samtang si John Yre wala pa makauli sa duha ka laptops, cellphone ug rescue vehicle nga gi-isyu sa iyang buhatan.

Nasayran nga nahimong kontrobersiyal ang rescue vehicle gumikan sa kantidad niini nga P3.5 milyones.

Gani aduna man kini kaso sa buhatan sa Ombudsman nga gisang-at batok ni kanhi mayor JVR ug sa iyang anak tungod kay gihulagway ang rescue vehicle nga overpriced. Nakapasamot sa kontrobersiya tungod sa pagkawagtang sa sakyanan nga naabot sa punto nga gipangita na sa konseho.

Apan nahibaw-an nga gipaayo diay kini sa kompaniya nga gipalitan. Asoy ni Vebar nga adunay tawo nga gipadala si kanhi mayor JVR ug maoy nagsusi kun unsa pa nga mga butang ang wala nila mauli ug nangayo og mga dokumento nga gikinahanglan aron ila kining maproseso.

Nipasabot si Vebar nga mahimo ra nga mabayran sa mga hingtungdan ang mga butang nga wala na nila mauli sa kantidad sa ilang pagpalit. Ang pag-uli sa mga butang nga gi-isyu maoy gikinahanglan aron sila makakobra na sa ilang separation pay.

Apan kun pabilin gihapon sila nga pakyas sa pag-uli hayan ang buhatan na sa Commission on Audit (COA) mao nay mopatawag kanila.  (BANAT NEWS)