Dengue sa siyudad nisaka

CEBU, Philippines - Nagtigum ang mga kapitan sa Dakbayan sa Sugbo ug mga tinugyanan sa panglawas gumikan sa nagkataas nga ihap sa kaso sa dengue.

Kapin pa lang sa tunga sa tuig apan 12 na ang nakalas sa sakit nga dengue gikan sa Enero hangtud karong buwan sa Agosto ug 1,333 nga ang nataptan sa maong sakit.

Sagad sa mga nakalas sa dengue mga tinun-an diin niadtong nilabay nga adlaw usa ka 10-anyos nga bata gikan sa Barangay Pung-ol Sibugay ang namatay.

Atol sa Dengue Forum nga gitambungan sa mga barangay officials, Department of Education ug City Health Department, gisentro nilang gituki ang pagsaka sa gidaghanon sa mga nangasakit sa dengue.

Giila sa CHD ang top 15 barangay nga gihugpaan sa dengue nga naglangkub sa Guadalupe-124 ug duha ang patay, Lahug-71 ug usa ang patay, Apas-60, Tisa-55 ug usa ang patay, Barrio Luz-52 ug usa ang patay, Mabolo-52, Labangon-49 ug usa ang patay, Talamban-46, Pardo-37, Basak San Nicolas-37, Mambaling-36 ug usa ang patay, Quiot-30 ug duha ang patay, Kamputhaw-28, Kalunasan-27 ug tulo ang patay, Kasambagan-24, Capitol Site-24, Basak Pardo-24, Busay-23, Kinasang-an-23, Sambag 1-22 ug Inayawan-22.

Nanghinaut si Dr. Raymond Ogan, medical specialist sa CHD, nga mosaler ang ilang info drive aron mausab na ang kinaiya sa mga tawo nga magpakabana.

Giaghat ni Ogan ang mga tawo nga magmatngon ug manglimpyo kanunay aron mawala ang kaitlogan sa lamok nga nagdala sa sakit nga dengue.

Samtang gipasalig ni Konsehal Mary Ann Delos Santos sa Dakbayan sa Sugbo nga suportahan nila ang kombate batok sa dengue sa tanang barangay.

Gihatagan usab og prayoridad sa Cebu City Medical Center ang mga dengue patients nga seguradong maluwas gikan sa makamatay nga sakit.  (BANAT NEWS)