Balota sa Barangay, Sangguniang Kabataan elections giimprinta na

CEBU, Philippines - Nagsugod na ang Commission on Elections (Comelec) sa pag-imprinta sa mga balota alang sa Barangay ug Sangguniang Kabataan elections.

Kini bisan pa man nga posibleng masibog ang piniliay karong Oktubre.

Matud ni Comelec-7 Director Rafael Olaño nga gisugdan na daan nila og imprinta ang balota sanglit gipaabot nga pila ka semana sa dili pa ang adlaw sa piniliay maoy paghuman sa pag-imprinta sa mga balota.

Iya usab gitataw nga nag-imprinta na ang Comelec daan og balota bisan wala pa ang pagduso sa certificate of candidacy sa mga kandidato sanglit manual ang pamaagi sa pagbotar.

Dili sama sa automated elections  kinahanglan i-imprinta ang pangan sa mga kandidato nga pilian.

Karon matud ni Olaño nga blanko ang balota ug kinahanglan nga isuwat ang pangan sa pilion.

Dugang niya kung masibog gyud ang piniliay ug dili madayon karong Oktubre, makadaginot ang Comelec og kapin sa P5 bilyones.

Awhag niya sa mga magbabalaud nga kun dili gyud madayon ang eleksiyon, sayohon ang pagpahibawo aron dili na makagasto pa og daku ang Comelec alang sa preparasyon.

Samtang gibutyag ni Cebu City Association of Barangay Councils (ABC) president Philip Zafra nga wala silay pagsupak kun isibog ang eleksiyon.

Giangkon ni Zafra kinsa mao usab ang kapitan sa Barangay Tisa nga kung dili mahinayon ang eleksiyon karong Oktubre pabor kini nilang mga incumbent barangay captains.

“Yes, mao nay giingon  nga hipokrito kaayo mi kun di ta moingon, it is advantageous kun motan-aw sa imong incumbency but as to whether advantageous siya sa barangay concerned depende nana sa performance sa barangay official,” matud ni Zafra.

Bisan layo pa ang eleksiyon duna nay mga pagpangandam nga gihimo ang mga magpapili.  (BANAT NEWS)