Patay sa buy-bust

CEBU, Philippines - Patay ang usa ka tawo nga napusilan sa mga polis sa buy-bust operation ug duha ang nasikop nga naglakip sa usa ka babaye apan ang suspetsado nga maoy target ang nakasibat alas 4 pasado ang takna sa miaging kaadlawon sa Sitio Upper Tawason, Brgy. Tawason, Dakbayan sa Mandaue.

Si Police Officer 1 Allan Bacus sa Presinto 6 sa Mandaue City Police Office (MCPO) ang miila sa namatay nga mao si Em-Em Solon nga taga Barangay Agsungot, Dakbayan sa Sugbo.

Ang nadakpan nga nakuhaan og shabu ug mga paraphernalia mao sila si Jockelyn Bacus, 30, ug Buenaventura Bargamento, 31, ang nakasibat mao si Cresenciano Heyrana alyas Bao,39, nga kapuyo ni Bacus kinsa usa sa ilang target.

Samtang nagpadung sa sud ang mga polis ilang nasugatan si Bargamento nga ilang nakuhaan og usa ka paketeng shabu.

Si Bargamento ilang gikuyog pag-adto sa balay sa managkapuyo ug maoy gihimong poseur buyer tungod kay kaila man sila.

Matud pa dihang gitunol ni Bacus ang drugas kang Bargamento gidakop dayon ang babaye apan nakamatikod si Heyrana nga polis ang kauban ni Bargamento maong dali kining midagan sud sa balay apan nigawas sa luyo ug nakasibat.

Gikatahong pwerteng kisi-kisi sa babaye ug nagsige og singgit pangayo og tabang hinungdan nga migawas si Solon kinsa giingong nagbitbit og pugakhang.

Apan naunhan pagpusil sa mga polis. Nakuha sa maong operasyon ang pinaketeng gidudahang shabu, shotgun, Frontier revolver , lakip usab ang usa ka magazine sa kalibre .45.  (BANAT NEWS)