Pundo gikan DSWD wala tarunga og gamit
CEBU, Philippines - Nakapangutana karon si Cebu City Councilor Margot Osmeña kun unsay nahitabo sa P2.8 milyones nga budget alang sa Comprehensive Program for Children and Families at Risk on the Streets nga gihatag sa Department of Social Welfare and Development (DSWD) sa Cebu City Government sa miaging tuig.
Nasuta niya kini human sa ilang panagtagbo sa DSWD. Sa gibutyag sa Department of Social Welfare and Services (DSWS) giingong wala magamit ang tanang pundo.
Gihulagway ni Osmeña nga mas maayo unta nga gigamit kini alang sa street dwellers. Iyang nahibaw-an nga anaa lang sa P800 mil ang nagasto sa maong pundo diin gigamit kini sa pagpahigayon og profiling sa kapin 600 ka mga street dwellers.
Gipasabot ni Osmeña nga ang siyudad daghan og programang gustong i-implementar apan ang problema, walay pundo. Gumikan sa maong hitabo nabali ang sitwasyon kay aduna na untay budget wala na hinoon mapatuman ang programa. Naguol ang konsehal niini maong nipahigayon sila og laing meeting sa DSWD aron mahibaw-an kun unsaon kini pag-implementar.
Ilang nasabutan nga ang Cebu City Task Force on Street Children motabang sa implementasyon samtang ang Cebu City Commission for the Welfare and Protection of Children mao ang implementing agency. Gamiton nila ang maong pundo karong tuiga sa programa nga giplano alang sa mga street children ilabi na nga adunay laing P1.4 milyones nga pundo nga ihatag ang DSWD alang sa siyudad. (BANAT NEWS)
- Latest
