5-anyos nakuryentehan sa pukot

CEBU, Philippines - Patay na nga naabot sa Tuburan District Hospital ang 5-anyos nga batang lalaki human nakuryentehan dihang naligo sa suba samtang adunay nangisda gamit ang kuryente sa Barangay Marmol, Tuburan pasado alas 6 sa nakalabay nga gabii.

Ang bata mao si Kevin Bayang Montebon nga nagpuyo sa maong dapit samtang ang mga nanguryente sa suba nga iyang mga silingan  sila si Roland Balbuena, 22; Romel Capala, 21; Kerwin Librea, 30 ug Jason Montebon.

Si Police Officer 2 Jennyfil Cañal sa Tuburan Police Station niingon nga gisugo sa iyang mga silingan ang biktima kauban ang iyang maguwang nga 7-anyos nga kuhaon ang mga isda.

Apan wala nabantayan sa iyang mga silingan nga nilipot diay sa ilang likod ang 5-anyos ug iyang nahikapan ang pukot nga nakakonektar sa live wire hinungdan nga nakuryentehan.

Ang upat ka silingan ang nagdala sa biktima sa tambalanan apan nakabsan gyud kini sa kinabuhi.

Human sa hitabo boluntaryo sab nga nitahan sa kapolisan ang upat ug temporaryong gikostudiya samtang nagpaabot sa kaso nga ipasaka. (BANAT NEWS)