‘Tatay’ sa mga layas gipusil patay

CEBU, Philippines - Gipusil patay ang tatay-tatay sa mga layas nga mangatulog sa seawall sa South Road Properties sa habig sa Compania Maritima sayo kagahapon sa kadlawon samtang kini natulog sa Barangay San Roque.

Ang nakalas naila nga si Mario Calumpiano, hingkod, dispatcher sa mga taxi sa gawas nga bahin sa Cebu South Bus Terminal ug maoy tigsagop sa mga bag-ong salta nga mopuyo sa lugar.

Matud sa usa sa mga saksi nga sayo sa gabii samtang nag-inom sila sa pipila niya ka higala, dunay upat ka lalaki ang nagbahas-bahas.

Alas 12:30 sa kadlawon maoy ilang nadunggan ang usa ka sipa nga buto sa armas ug wala lang nila panumbalinga tungod sa kahadlok.

Adunay namukaw nila mga alas 4 sa kadlawon human nakit-an si Calumpiano nga nagbay-ad na ug dunay samad sa tampihak agi sa kalibre .9mm nga armas base sa kabhang sa bala nakit-an.

Matud sa saksi nga matag adunay sampa sa maong lugar, si Calumpiano ang moabi-abi ug mopakaon ilabi na kadtong mga walay makaon.

Gihulagway nga si Calumpiano gitahud ug tigbadlong nila nga dili moapil-apil sa mga dautan nga binuhatan hinungdan nga nakurat na lang sila kay dili man kini maldito kanila. Si Calumpiano adunay kubol-kubol nga gipahimutang sa jackstone sa SRP.

Sa Lungsod sa Minglanilla, patay sa pagpamusil ang 29-anyos nga lalaki nga gikatahong nalambigit sa ilegal nga drugas sa Sitio Cetro, Barangay Tulay pasado ala una sa nakalabay nga kadlawon.

Ang biktima giila nga si Michael Mayola, ulitawo ug nagpuyo sa maong dapit.

Sa imbestigasyon sa kapolisan nasayran nga samad sa ulo ug ubang bahin sa iyang lawas ang naangkon sa biktima hinungdan nga kini namatay.

Base sa impormasyon sa mga nagpuyo sa maong dapit nga si Mayola ang nagbaligya sab og drugas ug nalambigit sa gun-for-hire.

Pasado ala una sa kadlawon dihang nakigtagay ang biktima kauban sa iyang duha ka higala, kalit lang naabot ang usa ka motorsiklo nga dunay sakay nga duha ka lalaki ug ang backrider ang kalit lang namusil sa biktima. (BANAT NEWS)