Mayor Loot nitugyan na sa mga armas

CEBU, Philippines - Gitahan na ni Daanbantayan Mayor Vicente Loot ngadto sa kapolisan ang 12 niya ka lainlaing armas human gipakanselar sa Department of Interior and Local Government ang mga lisensya niini.

Ang mga armas gipahatud ni Loot sa buhatan sa Firearms Explosives Security Service Agency and Guards Supervisory Section (FESSAGS)-7 sa Camp Sergio Osmeña Sr.

Ang kapolisan sa Daanbantayan uban ni Atty. Russel Soliano Pernites maoy nihatud sa mga armas ni Loot nga gisulod sa usa ka kahon.

Matud ni Pernites nga busy si Loot kay nagsingabot ang pista sa ilang lungsod.

Si Pernites niingon nga girespetuhan sa iyang kliyente ang kamanduan sa DILG apan moduso sila og motion for reconsideration. Ang pagkanselar sa lisensya sa mga armas ni Loot gihimo human siya pasanginli ni Presidente Rodrigo Duterte nga protektor sa mga drug lord apan nanghimakak niini ang mayor.

Gawas nga gi-revoke ang lisensya sa mga armas ni Loot, gikuhaan usab siya og police escort ug gibawian sa iyang pagka-deputy sa National Police Commission. (BANAT NEWS)