Tomas gikiha ni Alcover
CEBU, Philippines - Nisang-at og upat ka kasong graft ug administratiba si Konsehal Pastor Alcover Jr. batok kang Cebu City Mayor Tomas Osmeña sa Visayas-Ombudsman kagahapon.
Gireklamo ni Alcover ang paghatag ni Osmeña og cash reward sa mga polis nga makapatay og durugista niadtong panahon nga wala pa si Osmeña hingpit nga nilingkod sa pagka-mayor.
Matud ni Alcover nga base sa balaud gidili ang pagdawat og cash reward sa kapolisan ug militar.
“Kay mura man gud nag-encourage og patayan or extrajudicial killings,” matud ni Alcover.
Iya sab gireklamo ang pagtudlo ni Osmeña sa iyang mga kaalyado sa konseho isip deputy mayor lakip sa asawa sa mayor nga si Konsehal Margot Osmeña nga gihulagway ni Alcover nga nepotism.
Uwahing reklamo ni Alcover mao ang giingong pag-anunsiyo ni Osmeña nga kausa ra magpahigayon og flag ceremony nga giingong kalapasan sa Flag law.
Base sa balaud matud niya ang mga local government units kinahanglang mopahigayon og flag ceremony matag Lunes ug flag retreat matag Biyernes nga wala nahimo sa City Hall.
Gusto ni Alcover nga ipaubos sa preventive suspension si Osmeña samtang padayon ang imbestigasyon sa kaso nga iyang gipasaka.
Apan alang kang Konsehal Osmeña, dili angayang tubagon ang gipasakang kaso ni Alcover.Matud ni Osmeña nga ang gihimo sa mayor gihimo usab ni kanhi mayor Michael Rama ug gawas nga asawa siya sa mayor, pinili usab siya sa katawhan.
Gipasabot niya nga natural nga sila maoy pilion nga deputy mayors tungod kay duna silay pagsalig sa usa’g-usa.
Si Mayor Osmeña nilarga sa kaulohan kagahapon atol sa pagsang-at sa kaso ni Alcover. Le Phyllis F. Antojado ug Decemay P. Padilla (BANAT NEWS)
- Latest
