Wanted: CPDRC warden

CEBU, Philippines - Gibuksan sa Kapitolyo ang position nga jail warden alang sa Cebu Provincial Detention and Rehabilitaiton Center. Matud ni Gobernador Hilario Davide III, tulo ka posisyon ang ilang giablihan kini mao ang warden, jail guards ug lain pang position.

Sa pagkakaron nagsilbing warden si Davide samtang  iyang gitahasan ang pangulo sa Civil Security Unit (CSU) nga si Bobby Legazpi nga maoy  temporaryong motan-aw sa provincial jail. Dili mo-appoint og tawo si Davide aron ibutang sa pasilidad kay buot niyang mamili sa mga mo-apply sa maong position.

Samtang ang Provincial Health Office (PHO) mitutok karon sa panglawas sa mga priso sa CPDRC gumikan sa sunod-sunod nga kamatayon sa mga priso.

Si Dr. Rene Catan, hepe sa PHO mibutyag nga sa iyang pakisusi nasuta niya nga lisud ang sitwasyon sa mga piniriso diin tungod sa kahuot mosugmat gyud ang ilang mga sakit nga gihambin.

Giklaro niini nga ang nahitabo sa mga namatay nga piniriso dili “trauma” kay gidapatan sila apan daku ang posibilidad nga duna na silay sakit sa wala pa sila masulod sa prisohan ug misugmat kini dihang napriso na sila.

Gumikan niini gibutang si Dr. Henry Calledo sa maong pasilidad uban ang dugang mga nurse ug ang infirmary gipaayo na kay ilang tinguha nga makabaton og primary care capability o sama sa primary care hospital sa CPDRC. Dugang ni Catan nga sa kahuot sa prisohan kasagaran nga sakit nga nasinati sa piniriso mao ang sakit sa panit ug pneumonia. (BANAT NEWS)