Dul-an P200 mil nga shabu gikan sa Danao

CEBU, Philippines - Kapin sa P200 mil nga kantidad sa shabu, nasakmit sa kapolisan sa lungsod sa San Francisco ug sa dakbayan sa Danao sa managlahing operasyon niadtong nakalabay nga hapon ug kadlawon.

Nadakpan sa San Francisco Police si Aquino Delfin Pleños nga taga Barangay Santiago kinsa anaa sa top 5 drugs watch list sa Municipal Anti-Drugs Abuse Council (MDAC).  Matud ni PSInsp. John Libres, hepe sa San Franciso Police nga ilang gihimuan og buy-bust operation ang suspek ug nakuhaan kini’g mga pinaketeng shabu nga nikantidad og P75, 520.

Sa ilang gihimong interogasyon, nasayran nga gikan sa Danao ang suplay niini ug duna kini tawo nga gitug-an nga nagkonektar kang Medz Alvaro ang napatay sa kapolisan sa Danao. Daling gipahibalo ni Libres ang hepe sa Danao City Police nga si PSInsp. Alejandro Batobalonos kabahin sa maong impormasyon kinsa dali sab nga mihimo og operasyon hinungdan nga nasikop nila ang maglive-in partner nga silang Medel Formentera alyas Boboy ug Eva Lopez sa Barangay Cambanay. Nakuhaan sila og pinaketeng shabu nga nikantidad og P146, 910.

Matud ni Batobalonos nga ang duha ka operasyon nagpamatuod lang nga nalambigit gyud sa ilegal nga drugas si Medz Alvaro, sukwahi sa pangangkon sa iyang inahan nga si Ema Alvaro nga wala naapil sa kalihukan sa illegal drugs ang iyang anak nga namatay.

Sukad napatay sa kapolisan si Medz Alvaro, igsuon ni alyas Barok, padayong nakadawat og pagpanghulga sa cellphone ang hepe sa Danao City Police.

Sigon pa ni Batobalonos nga katapusan siyang nakadawat og death threat niadtong nakalabay nga buntag. Unod sa text  mao nga moabot ra kuno ang panahon sa pagbalos.

Gumikan sa maong mga operasyon nahibaw-an sab ni Batobalonos nga sa dagat himoon sa mga drug pusher ang ilang transaksyon. Kini ilang nasayran human mitug-an ang ilang mga dinakpan nga sa dagat sila sagad maghimo sa ilang transaksyon gumikan sa subsob nga kampanya sa kapolisan. Gani unang nagsabot ang kapolisan sa San Francisco ug sa ilang dinakpan nga himoon ang pinalitay sa dagat apan wala kini nadayon gumikan sa dagkung bawod. Giangkon ni Batobalonos nga daku kaayo og tabang alang kanila ang maong impormasyon aron apil sab nila nga matutokan karon ang kalihukan sa mga drug pusher sa kadagatan.

Sa lungsod sa Liloan, naatlan sa akto sa kapolisan ang tulo ka mga lalaki nga nagsuyop og shabu sa Barangay Poblacion niadtong miaging adlaw.

Gibutyag ni PO2 Eric Pintoy sa Liloan Police Station nga ang mga nadakpan mao silang John Jay Libre, Nicole Mondelo ug Dexter Sanchez.

Giingong usa ka polis sa dakbayan sa Mandaue ang mi-report bahin sa mga tawong nanuyop. Dihang gihimo nila ang pakisusi, ilang naaktuhan ang tulo nga nagsuyop ug nakuha gikan kanila ang usa ka gamay nga paketeng shabu  ug mga walay sulod nga plastic apan may lama nga shabu, mga tin foil ug drug paraphernalia.

Sa dakbayan sa Talisay, nasikop sa kapolisan ang duha ka drug pusher atol sa buy-bust operation niadtong Lunes sa Sitio Camalig, Barangay Dumlog. Target sa maong operasyon mao si Lito Bardillas nga nailhan sa ngalang Bonie Baradilla. Lakip nga nasikop si Remilito Acas alyas Emic.

Nakuhaan ang duha og siyam ka pakete sa shabu nga nagkantidad og P2, 124, buy-bust money ug laing P350. (BANAT NEWS)