‘NPA leader’ pabiling gikustodiya

CEBU, Philippines - Nagpabilin sa kostudiya sa kapolisan ang babayeng misyonaryo kinsa gipasanginlang high-ranking official sa New People’s Army (NPA).

Si Amelia “Amy” Pond nadakpan sa kapolisan sa Dakbayan sa Sugbo niadtong Biyernes tungod sa kasong double ug frustrated murder.

Ang Regional Trial Court Branch 7 sa Dakbayan sa Sugbo nioktaba sa hearing sa habeas corpus nga petisyon nga giduso ni Sister Francis Añover, national coordinator sa Rural Missionaries of the Philippines.

Kini aron mapresentar si Pond ngadto sa korte ug ideterminar kung dunay kalapasan ang pagtanggong kaniya ug kinahanglan ba siya nga mabuhian.

Atol sa pagdungog unta sa petisyon kagahapon, ang abogado ni Pond nga si Atty. Magdalena Lepiten, nikwestiyon sa representation ni Atty. Inocencio de la Cerna kinsa maoy legal counsel sa hepe sa Criminal Investigation and Detection Group-7 nga si Supt. Marlon Tayaba.

Si RTC Branch 7 acting Presiding Judge Marivic Trabajo-Laray nagkanayon nga ang Office of the Solicitor General (OSG) maoy dunay authority to appear sa proceeding sa habeas corpus. Ang duha ka habig nagkauyon sa pag-uswag sa hearing aron usab ang OSG makarepresentar sa CIDG-7.

Si Pond gidakop sa mga sakop sa CIDG human sa ilang kalihukan sa Barangay Lahug niadtong Biyernes tungod sa duha ka alias warrant of arrest sa double murder ug frustrated murder nga giisyu sa RTC sa Compostela Valley. Brenda D. Batuto ug gikan sa The Freeman (BANAT NEWS)