Sardinas ibaylo sa basura

CEBU, Philippines - Nagtinguha si Cebu City Mayor Tomas Osmeña nga sundon ang gihimo sa nasud sa Brazil diin ang mga tawo nga molabay sa ilang basura sa compactor dunay bugti nga itlog.

Giplanuhan ni Osmeña nga inay itlog ang ihatag sa matag bag sa basura nga ilabay sa mga tawo sa compactor, sardinas ang ilang ibaylo.

Matud sa mayor nga usa lang una ka eksperimento ang ilang buhaton ug sutaon una nila kun epektibo kini o dili.

 Gihulagway nga daghan kini og mahatag nga kaayuhan diin dili na kinahanglan pa mo-hire og dugang garbage loader ang siyudad ug dili na usab kinahanglan mogasto og minilyon ang siyudad aron ang mga drainage system malimpyuhan.

Sa iyang bahin, si kanhi konsehal Roberto Cabarrubias ug karon pangulo sa Department of Public Services nibutyag nga gikuha pagbalik ang technician aron maayo ang nangaguba nga compactor.

Ang siyudad adunay 10 ka compactor apan upat lang ang nagdagan sanglit ang uban daghan pa kini og ayuhunon.

Ang DPS makig-alayon sa Barangay Disaster Center Mayor’s Office aron sila nay mopahibawo sa mga tawo inig abot sa garbage truck.

Kinahanglang istriktohan ang implementasyon niini ug ang mga garbage trucks dili angay ma-late sa pag-abot sanglit dili man mahimong mohuwat ang mga tawo ug basin biyaan na lang nila daplin sa karsada ang mga basura.

“Mao na inig abot sa mga tawo nga magdala og bag of garbage ang driver inig human og load hatagan sila og suhol itlog unta pero sardinas na lang. Ang mo-load ana mga tawo dili na mga loaders,” matud ni Cabarrubias.

Gipaabot sa sunod semana masugdan na kini sa DPS diin ang pilot area niini duha ka barangay sa South District ug duha sa North District. (BANAT NEWS)