13 ka armas i-turnover ni Loot

CEBU, Philippines - Dili mominus sa 13 ka armas ni Daanbantayan Mayor Vicente Loot ang i-turn over sa Daanbantayan Police Station.

Matud ni Loot nga wala na siya moadto sa Firearms and Explosives Security and Guard Supervision kagahapon sa udto  tungod kay mao pa usab ang iyang pag-abot gikan sa Iloilo city alang sa lubong sa iyang igsuon.

Si Loot nitudlo na usab kang Atty. Neil Aaron Balili nga maoy iyang tigpamaba may kalabutan sa mga pasangil batok kaniya.

Sumala pa ni Balili nga nagtinguha sila nga moduso og motion for reconsideration tungod kay nagkinahanglan usab og armas si Loot ilabi na sa iyang seguridad ug sa pamilya ilabi na nga adunay mga dili maayong pulong nga anaa sa social media human sila gilambigit sa ilegal nga drugas.

Gitug-an ni Balili nga andam nila ihatud ang mga armas sa mayor sa police station.

Ang non-uniform personnel sa Daanbatayan Police Station nga si Vilma Corog niingon nga alas 4:30 kagahapon sa hapon, wala pay na-turnover nga armas sa ilang buhatan gikan ni Loot. (BANAT NEWS)