Hepe sa CPADAO gihulga
CEBU, Philippines - Gibutyag sa pangulo sa Cebu Provincial Anti-Drug Abuse Office (CPADAO) nga si kanhi bokal Carmen Remedios Durano-Meca nga nakadawat siya og hulga sa iyang kinabuhi.
Si Meca gipahimangnuan karon nga magbantay nunot sa maong hulga.
Matud ni Meca nga nakadawat siya og text message sa gabii niadtong Agosto 13, usa ka adlaw human napatay ang igsuon sa giingong drug personality nga si Alvaro Alvaro alyas Barok atol sa operasyon sa kapolisan sa Dakbayan sa Danao.
“Bawos-bawos lang ta ma’am. Gihilabtan man mi ninyo. Mosulod ka’g Danao, kuhaon sad ka namo,” pagbasa ni Meca sa usa ka text message sa iyang public number gikan sa wala mailhing tawo.
Matud niya nga ang maong mensahe iya nang gi-forward kang Senior Supt. Jose Macanas, ang director sa Cebu Provincial Police Office.
Si Meca niangkon nga dili mawala ang kahadlok ilabina sa iyang trabaho apan sa una pa lang nga siya ni-asumer isip pangulo sa CPADAO iya nang gipaabot nga adunay mga hagit sa iyang pagtrabaho.
“When I assumed office, I already expected the worst…bisan unsa pa ka straightforward ang program di malikayan nga naa di kauyon,” matud ni Meca.
Iyang gitataw nga dili hinuon kini makapahunong sa iyang adbokasiya sa pagpakigbatok sa ginadiling drugas. (BANAT NEWS)
- Latest
