Gigapos gi-salvage

CEBU, Philippines - Paingon pagkadugta nga lawas sa usa ka lalaki nga gigapos ug gituohang gi-salvage nakit-an diha sa hilit nga bahin sa Sitio Cantipla, Brgy. Tabunan ning Dakbayan sa Sugbo kagahapon sa buntag.

Ang imbestigador sa Homicide Section sa Cebu City Police Office, Police Officer 3 Edario Manatad nga nahinabi sa Banat News nagkanayon nga nadiskubrehan ang patay nga lawas sa usa ka Renato Gabunada, 49 nga taga Brgy. Taptap samtang kini nanguha og kompay.

Gibana-bana ni Manatad nga upat ka adlaw na ang patay nga lawas nga nagsuot og khaki cargo shorts, blue nga t-shirts, dakuon ang lawas ug taas ang buhok.

Ang mga sakop sa Crime Scene Investigation Unit (CSIU) sa Cebu City Police Office nga mihiling sa patay nga lawas nakakita og samad sa iyang dughan ug batiis nga gidudahang inagian sa pinusilan.

Gigapos ang mga kamot ug tiil niini og plastic tape. Gituohan nga gilabay ra sa dapit ang biktima apan gipatay kini sa laing lugar.

Nanawagan ang kapulisan kun kinsa kadtong nawad-an og sakop sa pamilya nga mobisita lang sa buhatan sa kapulisan o sa St. Francis Funeral Homes aron sa pag-ila sa patay nga lawas. (BANAT NEWS)