Nisukol atol sa drug bust napatay
CEBU, Philippines - Patay ang usa ka notadong tigpayuhot og drugas sa Lungsod sa Daanbantayan human gikatahong misukol sa mga polis atol sa buy-bust operation diha sa Sitio Fermina, Brgy. Maya sa nakalabay nga hapon. Ang suspetsado giila nga si Ramil Bentulan nga nagpuyo sa maong dapit kinsa gihulagway ni Police Officer 3 Joel Pino sa Daanbantayan Police nga mitahan na sa miaging buwan human gipaubos sa Oplan Tukhang.
Apan sa ilang pagpaniid nagpadayon gihapon kini pagpamaligya og ilegal nga drugas maong gihimoan kini og buy-bust operation apan giingong mibunot kini og armas ug mipusil sa mga polis.
Apan gidemalas kay giingong wala nibuto ang armas niini maong naunhan, patay na kini pag-abot sa Daanbantayan District Hospital.
Narekober sa mga polis ang usa ka .38 paltik revolver, usa ka medium size sa gituohang shabu ug drug paraphernalia.
Samtang sa Dakbayan sa Sugbo, patay usab sa pagpamusil ang usa ka 52 anyos nga lalaki nga napa-ubos na sab sa Oplan Tukhang sa kapulisan diha sa A. Lopez Street, Brgy. Calamba sa nakalabay nga gabii. Giila ang biktima nga si Allan Taves. Usa ka lalaki nga nagmotorsiklo ang giingong nisud sa iyang lawak ug gipusil kini sa batiis ug paa apan nahutdan kini og dugo ug namatay.
Si Police Officer 3 Edario Manatad, imbestigador sa Homicide Section sa Cebu City Police Office nga nahinabi sa Banat News nagtuo nga di intensyon sa gunman nga patyon ang biktima kay wala man kini gipusil sa ulo o dughan bisan natulog ang biktima adto higayona. Nagduda si Manatad nga kaaway kini sa biktima nga gustong manimalos. (BANAT NEWS)
- Latest
