Abogado ni Espinosa gipatay

CEBU, Philippines - Patay ang abogado sa gipasanginlang “drug lord” nga si Rolando “Kerwin” Espinosa ug sa iyang amahan nga si Albuera, Leyte Mayor Rolando Espinosa Sr., human kini girapido sa wala mailhing mga tawo samtang sakay sa sakyanan diha sa Brgy. Lumbang 2 sa Dakbayan sa Tacloban pasado alas 2 kagahapon sa hapon.

Ang abogado giila nga si Rogelio Bato Jr., 42, ug lakip sa namatay ang iyang kauban nga usa ka 15 anyos nga batan-ong babaye nga nag-uniporme sa eskuylahan nga si Angelica Bonita, base sa pangalan sa school ID niini nga naglingkod tupad sa abogado.

Ang duha sakay sa usa ka Toyota Hi-Lux pickup nga nagdala sa plate number YHH 461 ug IBP plate “LAWYER.” Si Bato nakaangkon og samad pinusilan sa iyang liog, dughan nga pulos sa wala nga bahin sa iyang lawas, samtang ang 15 anyos nga babaye naigo sa walang bahin sa iyang nawong.

Nakita sa sakyanan ang 13 ka igo sa bala gikan sa M-16 Armalite Rifle ug gikan sa .45 caliber pistol nga giingong tumong tanan kang Bato. Si Sr. Supt. Rolando Badi ang director sa Tacloban City Police nagkanayon adunay nakakita nga usa ka puti nga Hi-Lux pickup ang nagsunod sa sakyanan sa abogado ug mi-overtake ug mibabag sa atubangan niini ug girakrakan ang sakyanan niini. Nakuha sa crime scene ang 18 ka basiyo sa M-16 Rifle ug unom ka basiyo gikan sa .45 caliber pistol. Gisubay pa ang motibo sa maong pagpamanhig.

Si Chief Supt. Elmer Beltejar ang director sa Police Regional Office-8 miingon nga usa sa mga tawo sa mga Espinosa nga ubos karon sa witness protection program sa mga polis mibutyag nga ang sakyanan sa abogado hinatag ni Kerwin. Si Bato ang nagsilbing abogado sa mga tawo ni Espinosa nga madakpan sa mga polis gumikan sa kaso sa drugas.

Si Mayor Espinosa dihang gikuhaan sa The Freeman igsuong pamantalaan sa Banat News og pamahayag miingon di siya mohatag og komento bahin sa maong insidente apan siya miingon nga aduna gyuy mga tawong gusto silang hutdon.

"They just started by killing our lawyer. Soon we will be the next," matud pa niya apan wala na modugang pa og detalye. Si Atty. Leo Giron, sakop sa Integrated Bar of the Philippines-Tacloban miingon nga ang pagpatay kang Bato makaapektar sa pangabogado ug makapahadlok kanila aron depensahan ang mga gipasanginlang nalambigit sa illegal drugs. Jojo Ugdol ug report nila ni Miriam Garcia Desacada, Lalaine M. Jimenea ug Eileen Nazareno Ballesteros sa The Freeman (BANAT NEWS)