GrabCar gilusad sa Sugbo

CEBU, Philippines - Ang mga drayber ug taxi operators sa Sugbo apektado sa operasyon sa Grab ug bag-ohay lang gilusad na usab ang GrabCar.

Si Richard Cabucos, presidente sa Metro Cebu Taxi Operators Association (MCTOA) nagkanayon nga dili sila  buot nga mamatay ang industriya sa taxi dinhi sa Sugbo kay dili lang sila ang mga apektado niini lakip na ang mga drayber.

Gibutyag ni Cabucos nga nganhi sa Sugbo mikabat ngadto sa 6 mil ka units sa taxi ang nagdagan ug gibana-banang miabot ngadto sa 12 mil ka taxi driver ang nanginabuhi. Ang GrabCar walay franchise samtang silang mga taxi operator nagbayad sa franchise ug sa uban pang mga rekisitos nga gikinahanglan.

Matud ni Cabucos nga nahibulong sila nganong gitugotan kini sa Land Transportation Franchising and Regulatory Board (LTFRB) ug gani miduso na sila og petisyon. Dugang niini nga kun ang Grab walay Provision Authority buot pasabot nga mga colorum kini.

Si Brian Cu  ang country head sa Grab nagkanayon nga ang GrabCar maoy nag-unang public transportation service sa Southeast Asia. Ug mao kini ang public transportation service diin maka-book pinaagi sa smart phones.

Iyang gibutyag nga sa Southeast Asia ang Grab mikabat ngadto sa 320 mil ang driver network.

Dinhi sa Pilipinas dunay pito na ka siyudad diin nag-operate ang GrabTaxi ug duha niini ka siyudad nagsugod na ang GrabCar ug ikatulo ang Sugbo.

Matud ni Cu nga ang GrabCar maoy convenient nga paagi sa transportasyon hinuon taas og mga 10 porsiyento ang plete niini kompara sa regular taxi.

Apan gipasalig niya ang kalimpiyo ug safety sa pasahero nga mosakay sa GrabCar.

Gibutyag usab ni Cu nga mihatag sila og insurance sa ilang mga drayber nga gipaubos usab sa basic first aid training sa International Federation of Red Cross nga usa sa ilang partner.

Ang maong first aid training magamit sa mga drayber kun gikinahanglan kun ugaling adunay pasahero nga nagkinahanglan og first aid.

Gipasigarbo usab ni Cu nga mokabat sa P60 mil ngadto sa P70 mil matag buwan ang kita sa regular driver sa Grab samtang sa ang mga part-time driver mokabat sa P20 mil ngadto sa P40 mil ang kita.

Dawaton sa GrabCar kadtong mga model sa 2013 pataas ug ipaubos kini sa screening sa road worthiness.  (BANAT NEWS)