Agro-Trade sa Kapitolyo buksan ugma

CEBU, Philippines - Migahin og P200 mil ang probinsya sa  Sugbo pinaagi sa Provincial Agricultures Office alang sa ipahigayon nga Agro-Trade Fare 2016 o “Tabo sa Kapitolyo” sa Capitol compound. Ang maong trade fare magsugod sa Agosto 1 ngadto sa petsa 6 subay sa ika- 447 nga anibersaryo karong bulan sa Agosto.

Matud ni Roldan Saragena ang provincial agriculturist nga moabot ngadto sobra 30 ka local government units ug 25 ka private exhibitors ang mikompirmar nga moapil sa agro-trade fare. Gawas diri sa lalawigan sa Sugbo ang lalawigan sa Bohol mobutang usab og booth  diha sa Kapitolyo pag-display sa mga produkto sa ilang lalawigan.

Gipaabot nga daghang agricultural products sama sa mga  organic, ornamentals, utanon ug handmade products ang ibaligya sugod karong Lunes.

 “We are expecting products coming from component local government units kun unsay ila gyud matawag nato nga best, agri best nga  ilang ma-display representing sa ilang lungsod,” matud ni Saragena.

Aduna usab ipahigayon nga contest   tali sa mga booth pinaagi sa pagpili sa “best booth, “early decorated booth”, pinakadaghan nga na-display ug pinakadako nga booth kun diin ang makadaog makadawat og premyo.  (BANAT NEWS)