2 gipamusil tipi

CEBU, Philippines - Duha ka mga lalaki ang gipamusil sa managlahing insidente nga niresulta sa ilang kamatayon. Usa ka 38-anyos nga lalaki ang gipatay kagahapon sa kaadlawon sa wa mailhing mamumuno nga nagsakay sa usa ka motorsiklo sa Sitio Candahuan, Brgy. Talamban, Cebu City.

Ang biktima naila nga si Rogil Nudalo kinsa matud pang Police Officer 1 Alcindor Suico, desk officer sa Talamban Police Station nakaangkon og samad pinusilan sa dughan ug wa nay kinabuhi.

Base sa imbestigasyon sa grupo ni Senior Police Officer 2 Fredilson Codilla sa Crime Scene Investigation Unit (CSIU) sa CCPO  ang biktima kinsa usa ka panday nakig-inom sa mga higala nga sila si Diomedes Tatoy ug usa ka naila lang sa pangalan nga  Titing dihang kalit naabot ang mga mamumuno ug diretsong mipusil sa biktima sa dughan sa makadaghang higayon.

Nakuha sa crime scene ang upat ka basiyo sa bala sa caliber .9mm ug cardboard nga naay marka nga "Pusher/Carnapper/Akyat Bahay ng CCDS."

Matud ni Suico wala sa drug watch list sa kapolisan ang biktima.

Samtang patay ang usa ka Albert Abraham Flores,33, human gipusil sa wala mailhing tawo diha sa Poblacion, Dakbayan sa Toledo.

Ang biktima adunay kapuyo taga Brgy. Tubod sa Dakbayan sa Toledo ug usa ka traysikad drayber. Sa imbestigasyon ni Police Officer 3 Alfredo Barquin sa Toledo City Police Station, ang biktima naglingkod sa seawall daplin sa dalan samtang nag-inom og kape dihang gipusil sa mga mamumuno  nga luwan og motorsiklo. Gituohan sa kapulisan nga personal nga bingkil ang motibo sa maong krimen.  (BANAT NEWS)