49 polis sa Central Visayas imbestigahon

CEBU, Philippines - Gipaubos karon og imbestigasyon ang 49 ka mga pulis sa rehiyon human sila napakyas pagduso sa ilang Statement of Assets, Liabilities and Net Worth (SALN).

Gibutyag ni Superintendent Henry Biñas, pangulo sa Regional Investigation and Detective Management Branch (RIDMB) sa Police Regional Office (PRO)-7 kabahin kini sa ilang internal cleansing  ang pagsusi sa SALN sa tanang polis sa rehiyon.

Kahinumduman nga kutob lang niadtong Abril 1 ang pagduso sa SALN apan nasayran nga 49 ka mga pulis ang wala makatuman niini.

Matud niya, kun dili makatarunganon ang rason sa mga pulis mahimo silang pahamtangan og silot nga pagkasuspenso sa serbisyo. Gipasabot ni Biñas, ubos sa balaod kun ang usa ka indibidwal pakyas sa pagpasa sa iyang SALN manubag gyud kini.

Nasuta nga sagad sa wala makaduso og SALN mga Police Non-Commissioned Officers (PNCO) ug dunay usa nga Non-Uniformed Personnel (NUP).

Kabahin kini sa ilang gihimo nga lifestyle check subay na usab sa kamanduan ni Department of Interior and Local Governmentc (DILG) Secretary Mike Sueno aron mahibaw-an kun dunay mga ill-gotten wealth ang mga polis.

Sa laing bahin gitug-an usab ni Biñas nga 11 ka mga polis ang nagpositibo sa ilegal nga drugas  apan usa lang niini ang nagnegatibo sa confirmatory test, ang napulo paesplikahon ug ipaubos sa pre-charge investigation.  (BANAT NEWS)