Drug suspects sa mga condo, subdivision targeton pud
CEBU, Philippines - Ang kapolisan sa Sugbo miklaro nga ang Oplan Tukhang dili lamang target ang mga namuyo sa mga squatters areas kundili apil na usab bisan ang mga nagpuyo og condominiums ug high end subdivisions nga nalambigit sa ilegal nga drugas.
Si Senior Superintendent Joel Doria, hepe sa Cebu City Police Office, nagkanayon nga walay gipili ang maong programa kontra sa druga, mapobre man o adunahan.
Apan matud niya dili sila basta-basta lang manuktok sa maong mga lugar sanglit magbase lamang sila sa mga nadawat nga impormasyon kun aduna ba gayuy presensiya sa druga sa maong subdivision o condominium.
“We will determine if nanduon ba sila sa subdivisions based sa information, then kakatokin natin,” sigon ni Doria.
Ang Oplan Tukhang kun tuktok-hangyo gilusad sa kapolisan sigon sa kampanya sa administrasyon ni Presidente Rodrigo Duterte nga pagpuo sa ilegal nga drugas sa nasud sulod sa unom ka buwan. Sulod sa maong programa, aduna nay kapin 32, 000 ka kabalayan sa Central Visayas ang nabisita sa kapolisan. (BANAT NEWS)
- Latest
