Patrolcars gipangapud-apod na

CEBU, Philippines - Gihatag na kagahapon sa mga nagkadaiyang unit sa kapulisan sa rehiyon ang mga sakyanan nga nadawat sa Police Regional Office (PRO)-7 gikan sa nasudnong kagamhanan.

Sa 21 ka mga Mahindra patrol vehicles ang tulo gihatag diha sa Cebu City Police Office.

Gihulagway ni PRO-7 Regional Director Chief Superintendent Noli Taliño makatabang kini alang sa operasyon sa kapulisan sa siyudad human gipugngan sa kagamhanan sa siyudad sa Sugbo ang 15 ka mga pick-up niini nga niadtong Hulyo 21 unta gikatakda nga iturn-over sa CCPO.

Giangkon hinuon ni Taliño aduna kini epekto tungod kay gikinahanglan gyud nila kini ilabi na sa ilang pagpatuman sa ilang anti-illegal drugs campaign. Apan siya mitataw nga dili kini mahimong rason aron dili nila mabuhat ang ilang mga trabaho ug pagpadayon sa ilang kampanya batok sa ilegal nga drugas. Una niini, si Cebu City Mayor Tomas Osmeña dihang gi-interview sa usa ka radio station nagkanayon nga iyahang ipa-recall ang pipila ka mga sakyanan nga gi-isyu sa siyudad ngadto sa CCPO.

Si Senior Superintendent Joel Doria, city director sa CCPO miasoy nga kun unsa may nakalatid sa memorandum nga iyang madawat ila kining tumanon.

Hinuon ang pangulo sa General Services Office Ronaldo Malacora miingon nga wala pa siya makadawat og kamanduan gikan sa mayor nga ipa-recall ang mga sakyanan sa siyudad diha sa CCPO.

Samtang, gawas sa mga sakyanan ipanghatag usab ang dugang mga motor nga moabot sa 147 ka buok alang sa kapolisan.  (BANAT NEWS)