Tubig nga milagroso?

CEBU, Philippines - Gikagubtan karon sa katawhan ang kahibudngan kaayo nga tubig nga nagtubod sa kilid sa usa ka kapilya sa Sitio Laguna sa Barangay Basak-Pardo kay daghan ang nagtuo nga kini usa ka milagro.

Padayong nag-ambahan ang gatusan ka mga tawo, ang uban kanila gikan sa lagyong mga dapit nga nakadungog sa balita sa radyo ug sa telebisyon, aron sa pagkuha og tubig nga ilang ikahaplas sa lawas ug ang uban miinom gyud gani sa maong tubig.

Si Jonie Reyes, presidente sa kapilya ni San Roque, miingon nga wala gayud sila magpatuo nga milagro kining pagtubod sa tubig nga ang tinubdan gikan sa altar nga bahin sa kapilya, ug wala usab gani sila midasig sa mga tawo nga imnon ang tubig.

Matud ni Kapitan Yolandito Cagang sa Brgy. Basak-Pardo nga miawhag na siya sa kadagkoan sa Cebu City Health department aron himoan og pakisusi kun dili ba makadaot sa panglawas sa mga tawo kun imnon ang maong tubig.

Daghang miinom sa maong tubig, apil na si traffic enforcer Tayox Limbaga, nga usa ka lumolupyo sa maong dapit, matud niya nga lahi kaayo ang lami sa tubig ug klaro nga dili kini gikan sa MCWD.

Matud ni Limbaga nga ang tubig sa MCWD adunay chlorine ug maila kaayo sa iyang baho apan ang tubig nga gikuha nila gikan sa haligi sa kapilya, lunsay ang kalami.

Ang duha ka bata nga nagsige og kawos sa tinubdan sa tubig gamit ang baso dili makaato sa kusog kaayong tubod. Nadiskitahan kining maong tubod mga tulo ka semana na ang milabay dihang mikalit lang nga nagbasa ang semento.

Ang kadagkoan sa kapilya magsaulog sa kapistahan ni San Roque karong Domingo. Matud ni Romeo Hugo, adviser sa mga opisyal sa kapilya nga human sa pista ilang kawton ang maong tinubdan aron pagsuta kun diin gayud gikan ang tubig.

Dunay mga masakiton nga miangkong naayo sila human nga miinom ug gihaplasan nila ang ilang lawas sa tubig gikan sa tubod. Bisan si Reyes nga presidente sa kapilya, mikupos ang iyang hubag sa kamot dihang iyang gihumod sa tubig ang hubag.  (BANAT NEWS)