P6.3M shabu
CEBU, Philippines - Mokabat na og P6.3 Milyones nga balor sa illegal nga drugas ang nasakmit sa kapulisan sulod lamang sa buwan sa Hulyo subay sa anti- illegal drugs operation nga gipahigayon sa Police Regional Office 7.
Gibutyag kini ni Senior Insp. Henrix Bancoleta sa Regional Anti-Illegal Drugs Special Operations Task Force atol sa gipahigayon nga Talakayan sa Isyung Pulis nga gipahigayon kauban ang Philippine Information Agency kagahapon.
Matud pa ni Bancoleta sukad niadtong Hulyo 1 hangtod niadtong petsa 28, gihimo nila ang Oplan Tukhang sa 32,031 ka panimalay sa rehiyon diin 14,670 gikan sa probinsya sa Bohol.
Sumala pa ni Bancoleta, 62,920 na usab ka mga pushers ug users ang nitahan sa ilang kaugalingon ug 57,902 niini ang users ug 4, 388 ang pushers ug 25, 205 ka anti-drug operation ang ilang nahimo nga niresulta sa pagkasikop sa 332 ka tawo.
Si Police Regional Office 7 Regional Director Police Chief Supt. Noli Taliño, nibutyag nga gumikan sa ilang pagpahugot nga kampanya batok sa ginadili nga drugas, sulod lamang sa 3 ka semana sa iyang paglingkod ubay-ubay na silang nahimo nga mga operations. Nagtuo siya nga di maabtan og unom ka bulan mawala nila sa hingpit ang problema sa ginadili nga drugas.
Sa miaging adlaw kapin usa ka milyon ka pesos nga kantidad sa shabu ang nasakmit sa Provincial Intelligence Branch sa Cebu Provincial Police Office atol sa buy-bust operation diha sa Heavenly Palms Beach Resort, Brgy. Estaca sa Lungsod sa Compostela.
Nadakpan si Glenn Obdamin, alyas Glenn, taga Brgy. Sabang, Dakbayan sa Danao nga gihulagway nga level 2 drug pusher. (BANAT NEWS)
- Latest
